ശബരിമല മണ്ഡല മകരവിളക്ക് മഹോത്സവത്തിനായുള്ള ഒരുക്കങ്ങൾ പത്തനംതിട്ടയിൽ ചേർന്ന ഉന്നതതല യോഗം വിലയിരുത്തി. തീർത്ഥാടകർക്കും ഉദ്യോഗസ്ഥർക്കും പമ്പയിലും സന്നിധാനത്തും ആവശ്യമായ സൗകര്യങ്ങൾ ഉറപ്പാക്കാൻ യോഗത്തിൽ തീരുമാനമായി. ഇതിനൊപ്പം, തീർഥാടന കാലയളവിൽ ജില്ലയിലെ ഹോട്ടലുകളിലെ വെജിറ്റേറിയൻ ഭക്ഷണസാധനങ്ങൾക്ക് ഏകീകൃത വില നിശ്ചയിച്ച് ജില്ലാ കളക്ടർ ഉത്തരവിറക്കി.
പത്തനംതിട്ട ഗെസ്റ്റ് ഹൗസിൽ വച്ചാണ് ശബരിമല തീർഥാടനവുമായി ബന്ധപ്പെട്ട അവലോകന യോഗം ചേർന്നത്. ദേവസ്വം ബോർഡ് പ്രസിഡന്റ് കെ. ജയകുമാർ, ജില്ലാ കളക്ടർ എ. നിസാമുദ്ദീൻ എന്നിവരുടെ നേതൃത്വത്തിലായിരുന്നു ചർച്ച. പമ്പയിലും സന്നിധാനത്തും ഡ്യൂട്ടിക്കെത്തുന്ന ഉദ്യോഗസ്ഥർക്കും ദർശനത്തിനെത്തുന്ന ഭക്തർക്കും ഒരുക്കേണ്ട അടിസ്ഥാന സൗകര്യങ്ങളെക്കുറിച്ച് യോഗം വിശദമായി വിലയിരുത്തി.
തീർഥാടനത്തോട് അനുബന്ധിച്ച് ജില്ലയിലെ ഹോട്ടലുകളിൽ വെജിറ്റേറിയൻ ആഹാരസാധനങ്ങൾക്ക് ഏകീകൃത വില ഏർപ്പെടുത്തിയതായി ജില്ലാ കളക്ടർ അറിയിച്ചു. തീർഥാടകരെ ചൂഷണം ചെയ്യുന്നത് തടയുന്നതിന്റെ ഭാഗമായാണ് നടപടി. തീർഥാടന കാലയളവിൽ ജില്ലയിലെ എല്ലാ ഭക്ഷണശാലകളിലും ഭക്തർക്ക് എളുപ്പത്തിൽ വായിക്കാൻ കഴിയുന്ന രീതിയിൽ വിലവിവര പട്ടിക നിർബന്ധമായും പ്രദർശിപ്പിക്കണമെന്നും കളക്ടർ കർശന നിർദേശം നൽകിയിട്ടുണ്ട്.
യോഗത്തിൽ ജില്ലാ പോലീസ് മേധാവി ആർ. ആനന്ദ്, ശബരിമല എ.ഡി.എം ദിലീപ് കെ. കൈനിക്കര, ദുരന്തനിവാരണ വിഭാഗം ഡെപ്യൂട്ടി കളക്ടർ എ. വിജയൻ, ദേവസ്വം ബോർഡ് അംഗം പി. ഡി. സന്തോഷ് കുമാർ എന്നിവരും മറ്റ് മുതിർന്ന ഉദ്യോഗസ്ഥരും പങ്കെടുത്തു.
Sabarimala
